दुष्काळाच्या झळा तीव्र; पशुधन जगविण्याचे मोठे आव्हान, चारा छावण्या व शासनाच्या मदतीची मागणी

सांगोला विशेष प्रतिनिधी 

विकास गंगणे 

मो.9881583935

सांगोला : यंदाचा खरीप हंगाम शेतकऱ्यांसाठी अत्यंत कठीण ठरला असून, पावसाअभावी अनेक भागांत पिकांचे मोठे नुकसान झाले आहे. खरीप हंगाम संपत असतानाच आता जनावरांच्या चाऱ्याचा गंभीर प्रश्न शेतकऱ्यांसमोर उभा राहिला आहे. शेतातील कडबा, वैरण आणि हिरवा चारा कमी झाल्याने पशुधन जगवायचे कसे, असा सवाल शेतकऱ्यांकडून उपस्थित केला जात आहे.

दुष्काळी परिस्थितीमुळे शेतकऱ्यांच्या हातात उत्पन्नाचे साधन कमी झाले आहे. त्यातच जनावरांसाठी दररोज लागणारा चारा आणि पाण्याची व्यवस्था करणे मोठे आर्थिक आव्हान बनले आहे. बाजारातून चारा विकत घ्यावा लागत असल्याने शेतकऱ्यांच्या खर्चात मोठी वाढ होत आहे. दूध देणाऱ्या जनावरांना पुरेसा चारा मिळत नसल्याने दुग्ध व्यवसायावरही परिणाम होण्याची भीती व्यक्त होत आहे.

जनावरे ही ग्रामीण अर्थव्यवस्थेचा महत्त्वाचा आधार असून, अनेक शेतकऱ्यांचे दूध व्यवसायावर कुटुंबाचे आर्थिक गणित अवलंबून आहे. मात्र चारा टंचाई वाढल्यास जनावरे कमी किमतीत विकण्याची वेळ शेतकऱ्यांवर येऊ शकते. त्यामुळे शेतीबरोबरच पशुधन वाचविण्याचेही मोठे संकट निर्माण झाले आहे.

दरम्यान, प्रशासनाने दुष्काळी परिस्थितीचा गांभीर्याने विचार करून चारा उपलब्धता, चारा छावण्या, पाण्याची व्यवस्था तसेच पशुधनासाठी आवश्यक मदत तातडीने उपलब्ध करून द्यावी, अशी मागणी शेतकरी वर्गातून होत आहे. खरीप हंगामाने शेतकऱ्यांना आर्थिक फटका दिल्यानंतर आता चारा टंचाईचे संकट अधिक तीव्र होण्यापूर्वी प्रशासनाने ठोस उपाययोजना करणे गरजेचे आहे.

शेतकरी म्हणतात, “शेतीतून उत्पन्न नाही, घरात चाऱ्याचा साठा नाही आणि बाजारातील चारा महाग झाला आहे. अशा परिस्थितीत जनावरे जगवायची तरी कशी?” त्यामुळे दुष्काळग्रस्त भागातील पशुधनासाठी शासनाने तातडीने मदतीचा हात पुढे करावा, अशी अपेक्षा व्यक्त होत आहे.